يالشوق قلبى إليك ..غدا سنعود وتعود

الخميس، يونيو 19، 2008

رسالة إلى المدونين و المدونات

معلش يا جماعة كان نفسي أحط صورة ... و بعد ما روحي طلعت .... مش عارفة المشكلة في الموقع و لا
الجهاز ... مش راضي يحمل الصورة ... و الله الصورة عجبتني و كانت حلوة
هذه رسالة مني إلى بعض المدونين و المدونات
ا\ خديجة عبد الله
ارحمي خالتو أميمة يا خديجة .... حطت صوابعها العشرة في الشق منك ... بسبب صغر الخط اللي بتستخدميه .... و ده
كله عشان ايه ...
عشان الموضوع يطلع تنسيقه كويس .... و احنا نتعمي عشان خاطر التنسيق
د \ زيزو
على فكرة أنا كنت رديت لحضرتك على موضوع في المدونة .... و حضرتك لما رديت على الناس رديت على الشخص
اللي بعدي و على
الشخص اللي قبلي ....
فيعني قلت أقول لحضرتك
عشان لو كنت تجاهلتني عمدا : فنيتي أحرجك ... أما لو كان غصب عنك ... فنبهتك
د\ خبيب
برغم اللي حضرتك كنت كتبته في احد مواضيعك ... ان نجاح الشخص ... ليس بعدد الردود على المدونة ... الا أنني و
من موقعي هذا
أحقد ... معذرة (أغبط) حضرتك على عدد الردود اللي بتكون في مدونتك ... و انها اكتر من الردود اللي عندي
اختكم دعاء
او بمعنى ... اختي دعاء ... على فكرة نصيحتي ليكي ... انك تعملي ليكي مدونة تكتبي فيها مذكراتك انت و ابنك محمد -
ربنا يخليهولك -
و كفاية بس المعركة الطاحنة اليومية عن الواجب المدرسي ...و هو لسه في أولى ابتدائي أمال لما يوصل ثانوي .... ايه
اللي هيحصل ؟؟؟
م \أبو أسامة
مدينة لحضرتك باعتذار لانك كنت مرة طلبت الرد على موضوع ... و أنا عرفت متأخر ... نظرا لأن الكمبيوتر بتاعي
وعكاته الصحية
كتير ... و لما عرفت النت كان فصل عند خديجة ...و لما النت رجع عند خديجة حضرتك قفلت التعليقات لظروف
الامتحانات ... و لما
فتحت التعليقات ... و عرفت ... الاضراب كان عدى ... لان الموضوع عن الاضراب
ثانيا بقة : أنا مقصرة جداا في الردود على مواضيع حضرتك ... لأنها بتفكرني بالفطير المشلتت ... يا دوب بتاكل حتة
صغيرة و متعرفش
تكمل ...و أنا حقيقة يادوب اقرأ حتة صغيرة و أتلكم و مش أكمل
خالتو \ أميمة
مش عارفة أقول لحضرتك ايه ... إلا أنك وحشتيني جدااااا و نفسي أشوفك و لا تعليق على موضوعاتك .... إلا انها
رااااائعة و مفيدة و
المعنى بيوصل بسهولة من غير كلاكيع كلام
د \جاله الضغط
حضرتك جالك الضغط .... ايه لازمة اننا كمان يجلنا الضغط ... هو كده كده هيجيلنا ... مش لازم يجلنا بدري كده
خالتو \ ايمان العزب
مواضيعك يا خالتو قريبة جدااا من القلب ... دائما بتلمس احساس بداخلنا و بتحطي ايدك على الجرح .... استمري
كده .... و ربنا يوفق
أولادك في الثانوية العامة و جميع أولاد المسلمين
د\ صريح أوي
حضرتك بتقف كتير ... فهل يا ترى يا هل ترى ؟؟؟؟
بسبب الجغرافيا: ربنا يجازي اللي كان السبب
هنصحك النصيحة اللي نصحها أحد أئمة المساجد للمصلين ... لو حد منهم وقف كتير في طوابير العيش يا خدوا معاهم
مصحف و سبحة و يقرؤوا قرآن و يستغفروا
و على فكرة ... زي ما قلت لحضرتك هأتعلم الشعر أنا و خديجة و هنكتب قصائد ... و نعمل دواوين
د \الفارس المسلم
حضرتك بعد غياب جيت و قلت ما تعليق الزائرين ... أنا خايفة كمان شهرين تجيلنا نفس الصورة ... بس الراجل من
ناحية الخد الشمال و
تقول ما تعليق الزوار .... بدل الزائرين ... يعني نوع من أنواع التجديد
د \آلاء محيي
أحبك في الله ... مواضيعك جميلة و هي إن دلت على شيء ... فإنها تدل على أن صاحبتها تتمتع بشخصية متسامحة و
جميلة و طيبة إلى
أبعد الحدود ... ربنا يوفقك و يكرمك يارب
د \ قلمي
مش لازم تكتبي الموضوع متقفل من كل ناحية ... ابقي سيبي ثغرة الواحد يعبر فيها عن رأيه حتى
ا\ أخت مسلمة
هأرد على التاج اللي انت بعتيه ... ان شاء الله البوست القادم .... و بجد ... بحب تعليقاتك عندي ... ربنا يكرمك و يوفقك
د\ ايهاب
اعتذر لأني لم أرد لحضرتك عن أي موضوع حتى الآن ..... و لكني أشكرك جداااا لأنك متابع مدونتنا ... و ده اعتبره
شرف لينا - أنا و
خديجة -
ا\ العسكري عتريس و ا\ اسم الدلع ارهابي
على فكرة ... انتوا حاطين لينك المدونة و كاتبين ... لا للسكوت خديجة عبد الله ... بس هي بقت من زمان ... لا للسكوت
يمنى و
خديجة ... و هتبقى في المستقبل ... لا للسكوت يمنى بس
ا\ أم حبيبة
فينك يا أم حبيبة ... هو النت فاصل عندك إنت كمان ....؟؟؟
حتة غتاتة ... أخبار حبيبة إيه؟؟؟ سلميلي عليها كتير أوي ؟؟؟
د\هيرو
مدونة ... بجد بجد من الآخر ... و ربنا يخليلك العربية المرسيدس
د\ مطرح ما ترسى دقلها
مدونة تنم عن شخصية عندها فعلا 72 سنة
د\ نوح
أنا عارفة ان حضرتك كنت كاتب موضوع رسالة للمدونين ... بس أكيد موضوعي أقيم و أدسم ... و فيه من الفائدة ... ما
ليس في موضعك
معلش يا خديجة ... أنا انتهزت فرصة النت فاصل عندك ... فقولت أدخل أتكلم براحتي ... انتظروا آخر مواضيعي ...
طالما النت عند
خديجة بايظ ... و ادعوا للنت يرجع ... بس من غير ما اتفصل من المدونة
معلش بس هي ... ليه كل الناس ... قعدت تحقد على خديجة ... لما كتبت بيت الشعر إياه ... ده كله ... عشان محدش
بيعرف يكتب شعر زي اللي كتبته
بجد يا جماعة ... أوعوا حد يزعل بالله عليكوا ... أنا حسيت الناس مكتئبة ... قلت أهزر ... فأنا آسفة لو كان هزاري تقيل
على حد ... و برده راعوا ظروفي لسه طالعة من امتحانات

الثلاثاء، يونيو 03، 2008

تلك خاطرة


إذا أخفقنا فإننا نسارع بالقول : لم يكن إلا حلما ولكن ألا تعني أداة الاستثناء تلك فصله عني
أليس بحلمي ألا تكفي ياء المتكلم في آخره أن تبرهن أنه يعني لي الكثير !

قرأت أن الأطفال الصغار يبكون فالبكاء ترجمة لما يريدون قوله أو التعبير عنه
ولكن لماذا يبكي الكبار إذن رغم قدرتهم علي الكلام ..لابد أن الخطب جلل

كنت أنظف الأكواب وتوقفت لبرهة مع أحدها وراقبت نفسي و أنا أقوم بهذا فوجدت أنى
أجلو داخل الكوب قبل خارجه ففكرت لربما نحن أيضا بحاجة هذا التتابع (داخل وخارج)
(قلب وقالب) حتى نحقق اللمعان المطلوب

في أحد زيارتي لبلدتي الريفية الحبيبة تسللت خلسة دون أن يراني أحد لكي أقود دراجة
ابن عمتي رحمها الله وانزعجت جدا ليس لأني وقعت من عليها ولكن لاكتشافي أن قيادة
الدراجات صفة مكتسبة .. وجعلني هذا أفكر كم من الصفات اكتسبت وكم منها فقدت

أن أحرص على أن تدعو لي فهذا شيء طبيعي فالجنة تحت أقدامها ولكن أن تسألني أن
أدعو أنا لها فذاك أمر رائع ومكانة ليتني أستحقها حقا

قالوا عيون الحب هي تلك التي ترى الجمال فلا ترى القبح فتعجبت فكيف بالمؤمن مرآة
أخيه ولكني عدت فقلت نعم لا ترى القبح فهي تمحوه تزيله تجبر كسره
ولكن لا تقنع نفسك يا هذا أنك بسلوكك الخشن ذاك " تحب" فما فعلته لا يعدو إلا أن يكون
نيران صديقة
علي الهامش كده : مش ملاحظين إنى تدوينتي دى قصيرة نوعا ما علشان عارفة ظروف الملل والإمتحانات
يلاكل بثوابه :) ..دعواتكم ليمنى كتير جدا البنت غلبانة ومكسورة جدا اليومين دول :) بدون شماتة طبعا